पुनर्वसन करण्याची मागणी
आमदार अण्णा बनसोडे यांना साकडे
मुंबई दि. १५ (प्रतिनीधी) : भारतातील सर्वात श्रीमंत व्यक्ति म्हणुन ओळखल्या जाणार्‍या मुकेश अंबानी यांच्या राहत्या घरापासून हाकेच्या अंतरावर असलेले आणि मुंबई
चे पालकमंत्री मंगल प्रभात लोढा यांच्या मतदार संघातील नवी चिखलवाडी म्हाडा वसाहत अखेरच्या घटका मोजत आहे. मोडकळीस आलेल्या या इमारती मुळे या ठिकाणी मोठा अपघात होऊन मोठी जिवितहानी शक्यता निर्माण झाली असल्याची भीती येथील रहिवाश्यांनी व्यक्त केली आहे. याच पार्श्वभूमी वर येथील रहिवाश्यांनी सरकारचे प्रतिनिधी म्हणुन राष्ट्रवादीचे आमदार अण्णा बनसोडे यांची सदिच्छा भेट घेत येथील विदारक परिस्थिती लक्षात आणून दिली. दरम्यान अण्णा बनसोडे यानी रहिवाशांचे म्हणणे ऐकून घेत त्यांना मार्गदर्शन करीत सर्वतोपरी मदत करण्याची शाश्वती दिली.
अधिक माहितीनुसार, ग्रँट रोड रेल्वे स्टेशन लगत पश्चिमेस नवी चिखलवाडी परिसर असून या ठिकाणी म्हाडा वसाहतींच्या ११ इमारती आहेत. या इमारती ४० वर्षे जुन्या आहे त्यावेळी शरद पवार यांच्या हस्ते या इमारतीचे उद्घाटन करण्यात आले होते हे विशेष. तसेच या इमारतींमध्ये जवळपास ५३० कुटुंब गेल्या ४० वर्षापासुन राहत आहेत. सध्या म्हाडाची ही वसाहत मोडकळीस आली असून या इमारतींची दयनीय अवस्था झालेली आहे. अनेक वेळा येथील इमारतीचा स्लॅब खचून अपघात झाला आहे. तसेच अनेक कुटुंबांचा विस्तार झाल्यामुळे आता येथील रहिवाशांना दाटीवाटीने राहावे लागत आहे. विशेष म्हणजे अनेक मराठी कुटुंब मुंबईतून हद्दपार झालेली असताना आता मुंबई शहरातील मुख्य भागात राहणाऱ्या मराठी कुटुंबांकडे सुद्धा म्हाडा आणि राज्य सरकार कानाडोळा करीत असल्यामुळे जिवितहानी होणार की काय या भीतीमुळे घर सोडण्याची वेळ आलेली आहे. त्यामुळे मुंबईत उरलेला मराठी टक्काही कमी होणार अशी भीती व्यक्त केली जात आहे. या चिखल वाडीतील रहिवाशांची नुकताच एकनाथ शिंदे यानी भेट घेतली होती मात्र पुढे काही तोडगा निघाला नाही. त्यामुळे आता सदर रहिवाश्यांनी या इमारतींचे पुनर्वसन करण्यासाठी स्थानिक रहिवाशी निखिल घाडी यांच्या पुढाकाराने नुकताच एक संयुक्त बैठक घेतली. या बैठकीला पिंपरी चिंचवड चे आमदार अण्णा बनसोडे यांनी सदीच्छा भेट देत स्थानिक रहिवाशांच्या समस्या जाणून घेतल्या. पिंपरी चिंचवड या शहराचा कायापालट करणारे आमदार म्हणुन अण्णा बनसोडे यांना संपूर्ण महाराष्ट्रात ओळखले जाते. यावेळी आमदार बनसोडे यांनी या प्रकरणी म्हाडा प्रशासन तसेच इतर प्रशासकीय यंत्रणा यांच्याशी पाठपुरावा करीत सर्वतोपरी मदत करणार असल्याचे त्यांनी सांगितले. तसेच या ठिकाणी मराठी माणसाचे
अस्तित्व टिकले पाहिजे म्हणुन आपण सर्व रहिवाश्यांनी एकजुटीने हा पुनर्वसन प्रश्न सोडवायला हवा अशी आशा व्यक्त करीत मार्गदर्शन केले. आमदार बनसोडे यांच्या समवेत यावेळी नवी चिखलवाडी रहिवाशी संघचे पदाधिकारी यांच्यासह या क्षेत्रातील तज्ज्ञ प्रशांत घाडगे, सतिश लांडगे, संदीप चिंचवडे उपस्थित होते.
